Vecio capel
Vecio capel de alpin, tacà a la porta,
maciado e desformà da tanti ani,
la pena nera spelaciada e storta,
te me ricordi sempre i me vintani.
Vecio capel, te meto qualche volta
quanto se se trova tuti insieme,
quei che è restado, quei che no l'ha "tolta"
quei che la vita g'ha lissià le pene.
Capel de alpin, ne la me testa vecia,
te porti cante mai desmentagà,
sento fis-ciar el vento ne la recia,
e vedo el sol che incendia monti e prà.
Quando te g'è el capel te pari mato,
i dise quei che no capisse gnente,
lori i no sa che l'è 'n capel fatato,
malà de nostalgia, fato de gnente.
Dòneme ancora sogni a capelade,
imbriàgheme de sogni e poesia
e fame amar la gente e le contrade
regàleme salute e fantasia.
Vecio capel, se moro te voi rente,
nei pascoli del ciel su qualche stela,
soldà dei monti, eterna sentinela,
in barba a quei che no capisse gnente.
Umberto Rossignolo
